劇集篇幅長，可以慢慢鋪陳角色，一集一集累積戲劇張力；而且劇集製作時間相對較短，接觸嘅觀眾卻往往比電影更多，於是出色劇集可以更快回應各種潮流現象或社會議題，真正做到緊貼時代。不過最重要嘅，係電視始終係一門龐大生意，經營風險可以由不同節目攤分承擔，所以劇集「試新嘢」嘅空間理應比電影更多，亦更容易催生另類作品。
好似奇幻美學大師添布頓嘅新戲《怪誕黑家族》，就改編自6、70年代經典cult劇《Dark Shadows》。套嘢當年喺美國被安排喺下晝肥皂劇時段播影 --- 通常呢啲鐘數播嘅不外乎《真情》嗰類師奶食糧；不過創作主腦Dan Curtis竟然藝高人膽大，喺千篇一律嘅家庭倫理、恩怨情仇以外加入前所未見嘅懸疑同靈幻元素：除左主角巴拿班斯係一隻200幾歲嘅吸血殭屍，5年來穿插古老大屋嘅人物仲包括巫婆、巫師、人狼、喪屍、怪物等等，而時間旅行、平行宇宙等情節亦大模斯樣相繼出現，直頭當低水平保守觀眾冇到!
可以講，今時今日北美電視劇能夠文藝復興，能夠有《Lost》、《Heroes》、《Walking》、《Fringe》、《True Blood》、《Game of Thrones》呢啲結合戲劇同科幻/魔幻元素嘅成熟作品，《Dark Shadows》實在應記一功!
《Dark Shadows》嘅出現，令當年唔少識貨嘅o靚仔一反常態，晏晝3點幾波都唔打衝返屋企睇電視。就連cult界神臺人泰倫天奴、一代Pop后Madonna、性格型男尊尼特普同暗黑鬼才添布頓等等，細個都係套嘢嘅忠實fan屎。如今添布頓將呢套陳年作品電影化，可以話係意料中事。
老老實實，添布頓啲嘢有時好睇唔好食，尤其當部戲需要佢正正經經講故事嘅時候。第樣唔講，89年佢套《Batman》上映大家驚為天人，但今時今日拍埋《The Dark Knight》，你即刻明白佢嗰套美術無錯係一流，但故事卻係低能到唔入流。至於佢部《Planet of the Apes》，更加可以話係多此一舉嘅remake。有人話佢最擅長拍黑暗童話，不過sorry囉，拍完《Edward Scissorshands》同《Nightmare before Christmas》之後，佢啲戲往往只係將呢兩套嘢不斷回帶，只有《Ed Wood》同《Big Fish》係值得一看嘅例外。 但我依然想睇《怪誕黑家族》。原因好簡單：我鍾意佢部成名作《Beetlejuice》。個人認為，呢種以現代為背景，但係混入gothic魔幻元素嘅瘋狂黑色喜劇，先至係添布頓嘅真正強項! 而今次《怪誕黑家族》就開正呢瓣嘞! 加上有專演怪雞男嘅尊尼特普擔正，飾演古肅但係暗地裡情深款款嘅殭屍主角，可看性又高一成。 埋尾想講兩句題外話。電視，其實係一個社會最重要嘅流行文化教育。
有高質素電視劇如《Dark Shadows》嘅地方，自然會出到添布頓呢啲鬼才，甚至一般年輕觀眾長大後，電影品味都會勁抽啲。回顧70年代，本地電視業如日方中，加入電視台工作嘅莫不是讀包書又有型嘅創作精英。嗰個年代，電視劇又潮又有趣又有鬼佬文化氣息，簡直係比電影更有效嘅品味教育。可惜此情不再。 若閣下想提升電影修為，第一件事請戒睇CCTVB。 （戚其義作品除外）
導演:添布頓 主演:尊尼特普, 米雪菲花, 海倫娜寶咸卡達 上映日期: 已上映 蚩尤Profile 電影系畢業，自問唔襟捱兼好逸惡勞，遂自動放棄拍戲夢想，改投雜誌界以言不及義為樂。曾任職《Milk》及《明周》(MPW)，專攻電影、漫畫及文化研究；現為乜都寫自由撰稿人，電影文章則多見於《Metropop》。睇戲口味堪稱人格分裂，追求極cheap與極high，藝術片、cult片與類型片定時交替服用；唯獨最怕無色無味嘅大路嘢，多多錢都唔寫。
沒有留言:
發佈留言